Entry tags:

elections

Падрабязная справаздача ад Сяржука Сокалава-Воюша

ВЫНІКІ АПЫТАНЬНЯ НА ВЫЙСЬЦІ ВЫБАРЧАГА ЎЧАСТКУ Ў НЮ-ЁРКУ

Апытаньне на выхадзе з выбарчага ўчастку ў Ню-Ёрку праходзіла на працягу ўсяго выбарчага дня 19 сакавіка (з 8:00 да 20:00). Яго праводзіла група дараахвотнікаў. Кожны ўдзельнік групы быў адказным за адну канкрэтную гадзіну. Праз увесь часгаласаваньня разам з апытальшчыкамі знаходзіліся арганізатар групы Сяржук Сокалаў-Воюш (каманда Мілінкевіча) і Валеры Дворнік (прыхільнік Мілінкевіча, які зьвяртаўся да бальшыні выбарцаў з прапановай далучыцца да “народнага галасаваньня” з вынасам усяго, а ня часткі, бюлетэня).

Група здолела апытаць усіх (!) удзельнікаў галасаваньня 19 сакавіка. Паводле нашай групы вынікі выглядаюць наступным чынам:

Гайдукевіч – 0
Казулін – 10
Лукашэнка – 25
Мілінкевіч – 84
Супраць усіх – 6 (+1, які напісаў на бюлетэні “Пазьняк”).
Адмовіліся адказваць – 49

Усяго: 175 чалавек.
З гэтых 175-ці чалавек 11 выбарцаў ужывалі прынцып “народнага галасаваньня”. Пры гэтым на выхадзе пяцёра зь іх паведамілі, што галасавалі за Мілінкевіча й шасьцёра – супраць усіх. Зразумела, што іхныя галасы ў афіцыйных выніковых падліках фігураваць не маглі.

===============

Пасьля афіцыйнага падліку галасоў, на які ніхто, апрача прысутнай у консульстве выбарчай каміссі дапушчаны ня быў, мы атрымалі наступныя лічбы:

		Датэрміновае галасаваньне		19 сакавіка		Усяго
Гайдукевіч		0		2		2
Казулін		2		6		8
Лукашэнка		29+20		109		158
Мілінкевіч		2		51		53
Супраць усіх		0		7		7
Несапраўдныя		0		7		7
Усяго:		53		182		235

Зьвяртаюць на сябе ўвагу падазрона аднолькавая колькасьць галасоў за Мілінкевіча й Казуліна ў датэрміновым галасаваньні – па 2

Гэткія самыя два дастаў і яшчэ адзін “апазыцыянэр” дыктатара Гайдукевіч, але не датэрмінова, а 19 сакавіка.

Колькасьць тых, што прагаласавалі супраць усіх практычна ў нас і ў іх супадаюць.

Колькасьць несапраўдных бюлетэняў мы, зразумела, пракантраляваць не змаглі.

Вельмі праўдападобна, што ў часе нашага апытаньня тыя, хто адмовіліся сказаць за каго яны галасавалі, насамрэч галасавалі за Лукашэнку. Яны альбо стараліся зігнараваць, або вельмі непрыхільна паставіцца да апытальшчыкаў. Некаторыя зь іх пры гэтым казалі, што галасавалі “За чыстае неба”, “За сьветлае заўтра”, але тое, як яны казалі, іхныя інтанацыі й выразы твару паказвалі, што самое нашае апытаньне ім ненавіснае. Выбарцы Мілінкевіча так сябе не паводзілі.

Падазрона выглядае таксама розьніца галасоў у датэрміновым галасаваньні.